Det skulle gå etter det gamle.
Han blei lagt på likstrå
på låven
og dei helt andakt i heimen
før dei bar han ut.
Han bruka tida si her
i bakkane mellom skogen og sjøen.
Tråkka bratthenget
aleine eller bak hesten.
Tok ut i tidlege morgontimar
for å nytte dagslyset.
Da han kom att i skummørkret
hadde sett inn hesten
og gjeve han fôr
hadde han hatt ein lykkeleg dag.
Eg hugsar han fortalde om
den siste hesten sin
at den stoppa tri gonger
snudde seg, sto og såg seg
attende og vrinska – da han
leidde han
til slaktebilen.
Det mål hadde han sett seg
at han skulle snu torva
på landet under skogreina.
Plukke steinen – samle vatnet
i grøfter – harve og så
til det bylgja ein åker
med fulltungt korn.
Det var da dèn kom fyrste gongen
styngen i bringa
- og bakkane blei så tunge
frå da
Men han rakk å sjå kornet
- fullmoge -
siste sommaren.