• Photo: Ukjent tysk soldat (Opphavsrett)
  • Photo: Paul Sedal (Opphavsrett)

Tyske fangeleirar i Åsane

Under andre verdskrigen etablerte tyskarane to leirar for sovjetiske krigsfangar i Åsane. Begge vart tekne i bruk i andre halvdel av 1943.

Li og Saurås

Leiren på Nordre Liarinden på garden Li hadde fem brakker og to vakttårn. Det var den tredjestørste tyske fangeleiren i Hordaland med om lag 500 fangar. Saurås-leiren, som låg nedanfor kyrkja, kunne ta 150-200 fangar. Dei var fordelte på to brakker, og her fanst dessutan ei kjøkkenbrakke og vakttårn.

Hardt arbeid og brutal behandling

Russefangane vart sette til ymse arbeid, i første rekkje med å byggja tyske forsvarsinstallasjonar kring i Åsane og dessutan vegbygging. Mange åsabuar syntest synd på dei avmagra fangane og lukkast stundom med å stikka mat til dei. Som takk kunne dei få utskorne trefuglar, tobakksdåsar og ringar. Det var stor skilnad på fangebehandlinga i dei to leirane i Åsane. Medan tyskarane på Saurås stort sett følgde reglementet, var leirleinga på Li av den brutale sorten. Drap på fangar blei vanlegvis registrert som fluktforsøk. Av 27 gravlagde russarar ved Åsane gamle kyrkje skal såleis om lag 20 ha blitt skotne. Ofte dreidde det seg om desperat svoltne menneske som freista å skaffa seg føde. Fangedrapa på Li tok først slutt etter utskifting av leirleiinga. Dei ansvarlege tyske offiserane blei etter krigen sende til Sovjet og etter alt å døma henretta.

Minnestein over dei døde

Kyrkjelydane i Åsane fekk reist ein minnestein over dei 27 døde russarane på kyrkjegarden. Av leiren på Saurås finst framleis jernstolpar frå piggtrådgjerdet og ein vegstubb. På høgdedraget ovanfor kyrkja bygde tyskarane to bunkerar til bruk for soldatane som hadde vakt i leiren. Desse skal vera intakte, men er fylte igjen. Ein mur og nokre piggtrådrestar minner om fangeleiren på Li.

Share to