Sjåfør Ragnvald Hetle med passasjerar på vegen ved Dombås, på veg til bondestemne i Trondheim år 1946

Ragnvald Hetle fortel i boka "Transport mellom fjordar, Firda Billag 1920-1995" av Finn Borgen Førsund, om ein tur med S-1420 til Trondheim ved St.hans tid i 1946. Han hadde med folk frå Holmedal og Stongfjorden. Historia har fått tittelen:

"Med ny bil attende"

"Optimistisk og glad for ei slik utanlandsreise bar det avgarde frå Bygstad. Alt gjekk godt til vi tok til på Utvikfjellet. Då var radiatoren heit og kokte. Vi kom til Stryn og rekna med å få bilen reparert. Men ingen hadde tid til å vøla noko den dagen. I Stryn var dei likevel så hjelpsomme, at eg fekk låna meg ei gammal blekkbytte. Med denne hjelpa kom vi til Hjerkin på Dovre, der eg fekk reparert radiatoren. Med bilen i prima stand kom me til Oppdal ved midnatt.

Dagen etter var stemninga på topp. No skulle det gå fort til Trondheim. Eit par mil nordom Oppdal vart det ein kraftig smell. Der rauk universalleddet. Eg hadde merka meg at det var ei smie eller verkstad som me nett hadde køyrt framom. Gjekk så attende dit. Det merkelege var at dei der nettopp hadde eit slikt ledd liggjande frå før krigen. På mindre enn to timar var me på nytt i full fart mot byen. Men kor lenge var Adam i paradiset?

For så rauk dynamoen. Det lukta brent lang leid. Dei eg køyrde var heilt fortvila. Etter at eg hadde kopla om ymse leidningar og kopla tenninga direkte på batteriet, bar det til Trondheim på ny frisk. Spørsmålet var om batteriet heldt straum til me nådde fram. Kort fortalt nådde me målet. Eg fann ein elektrisk verkstad, og dagen etter var dynaomen på plass.

På tilbaketuren gjekk bilen som ny. Då eg reiste heimanfrå hadde eg med 500 kroner. Då eg hadde betalt hotellrommet i Stryn og kjøpt bensin der, hadde eg att kr 4,43. Etter å ha kjøpt middag i Førde, hadde eg att kr 2,43 då eg kom til Bygstad. Men så hadde eg no nesten kjøpt ny bil!"

Hetle fortel så til slutt, at passasjerane var stornøgde med turen og gav han 30 kroner i drikkepengar. Mykje pengar på den tid, 30 middager! (Firda Sjåførforeining)

Ragnvald Hetle var formann i Firda Sjåførforeining åra 1951-1966 og 1968-1982.

Fotografering: 1946