Gjermund Halvorsson Eikjarud

Eikjarud og den første ordføraren i Bø.
Garden Eikjarud i Bø har fostra ei særs evnerik ætt. Nemnast må Halvor Halvorsson Eikjarud som drukna i Hollane-vatnet i 1811, 29 år gamal. Han let etter seg ei interessant brevsamling, omtala i årsskriftet for Bø Museum i 1996.
Halvor skulle ha overteke farsgarden, men i staden blei det broren Gjermund Halvorsson, som tok over Eikjarud. Han hadde dei same gode evnene som Halvor, og Gjermund blei den første ordføraren i Bø da det kommunale sjølvstyret blei innført i 1837. Han kom til å spele ei sentral rolle i det offentlege livet i Bø i lang tid framover.
Eit særmerkt uttrykk for sterk sjølvkjensle må ein seie det var at far til brørne Halvor og Gjermund fekk ordna gravplass for seg og kona heime på Eikjarud. I tillegg til Halvor Rollevsson og kona Liv Gjermundsdtr. ligg sonen Gjermund Halvorsson gravlagt på Eikjarud.
Gjermund er truleg fotografert på ei byferd til Skien kring 1860.

Fotografering: 1860 - 1870

Aksesjon: 1984