Traktor

Henry Ford ville overføra erfaringane frå produksjonen av T-Forden og laga ein lett traktor, som eigna seg til masseproduksjon. Den første prototypen stod klar allereie i 1907. Denne var ikkje stort meir enn ein T-Ford med traktorhjul.

Ford intensiverte utviklingsarbeidet etter utbrotet av første verdskrigen, og kom med Fordson F i 1917. Det geniale var at ramma var fjerna, og motoren, girkassen og akslingen bak utgjorde éi eining i støypegods. Slik blei drivverket skjerma for støv og skit. Resultatet var ein enkel og billeg traktor. Han hadde eit godt forhold mellom vekt og kraft, og var lett å handtera. Fordson F var så kort at traktoren kunne plasserast sidelengs i ei jernbanevogn. Dette gjorde han også billeg å transportera.

Fordson F fekk bønder til å investera i sin første traktor, og sette slik fart i mekaniseringa av jordbruket. Snart kopierte alle traktorprodusentar denne modellen. Fordson F blei laga fram til 1926. Då var han produsert i 750 000 eksemplar, det meste som nokon gong er laga av ein traktortraktormodell. Den største kunden var Sovjetregjeringa som i 1926 bestilte 25 000 eksemplar.

Det var gode tider då Motortrading A/S byrja å importera Fordson F til landet i 1919. Frå før var det 20 traktormerke på den norske marknaden, og Fordson sleit med å koma inn. Optimismen forsvann brått med den økonomiske krisa frå 1921. Forhandlarar gjekk konkurs, eller ga opp salet. Produsentar forsvann også, og det blei vanskeleg å få tak i reservedelar. Bøndene blei meir skeptiske til den nye teknologien. Den einaste traktoren som blei marknadsført gjennom heile mellomkrigstida var Fordson. I perioden 1921-1935 dominerte dei salet åleine, dette var Fordson si tid i Norge. Denne traktoren er frå 1924, då blei det seld 69 Fordson F i landet.

Produksjon: November, 1924

Eierskap: 1924 - 1976 (Far til Martin kjøpte traktoren.)