Justisbygget blir reist vest for Sportskafeen. Brannstasjonen til venstre.

Sportskafeen var i første etasje i huset som stod mellom rådhuset/justisbygget og brannstasjonen. Kommunen oreigna huset i samband med bygginga av justisbygget, som stod ferdig september 1968. Eitt aspekt med rivinga var også at krysset ved brannstasjonen skulle verta meir oversiktleg. Eigarar av Sportskafeen var då Gudmund og Margreta Vårdal, som fekk to år på seg til å finne nytt husvære. Vårdal tok over styringa av kafeen frå Jorunn Pedersdtr Sandvin i 1963. Jorunn Sandvin var gift med Oddmund Torsteinson Sandvin, og etter å ha overdrege garden på Sandvin til hans yngre bror flytta dei til Odda, der dei tok over drifta av Sportskaféen i 1931.

Helene Torekoven dreiv kaféen i Handelshuset allereie i 1913, etter at første eigar Amundsen vann ein sum pengar og selde den. Kaféen gjekk då under namnet Kafé Central. Det var Torekoven som endra namnet til Sportskaféen i 1929.

Då huset vart rive, ynskja Vårdal å driva kaféen vidare. Kommunen hadde kome med tilbod om ein plass i det nye Justisbygget, men lokala var ikkje heilt eigna for dette. Sportskaféen flytta for ei kort tid inn i Folkets Hus før dette vart rive i 1971. I 1974 flytta Sportskaféen inn i nye lokale i 2. høgda i Sparebankbygget, etter å ha halde stengd i tre år. Her vart dei verande til dei stengde dørene for godt den 26. april 1991.

Kjelder: Lokalavisene Hardanger og Hardanger Folkeblad.

Fotografering: 1968 - 1975 (ant)